Мен Сiзбен өзiмнiң жеке блогымда кездескенiме қуаныштымын. Мен өз блогымның оқырмандармен керi байланыс орнағанын қалаймын. Мүмкiндiктерiңiз болса, маған өз пiкiрлерiңiздi жазыңыздар, ойларыңызбен бөлiсiңiздер, ұсыныстарыңызды айтыңыздар. Сiздердiң жазған әрбiр ой-пiкiрлерiңiздi мiндеттi түрде оқитын боламын.

01/01/17 01 қаңтар 2017 ж.

Құрметті аудан тұрғындары!

 

Сіздерді Жаңа 2017 жылмен шын жүректен құттықтаймыз!

Жаңа жыл- қашан да әр адамның жүрегіне жаңа үміттер мен аппақ армандар ұялататын, ғажайып қиялдарға қол создыратын ең сүйікті мереке. Барша адамзат бұл күні өткенді ой елегінен өткізіп, саралап, Жаңа жылға таза ниетпен, болашаққа деген мол сеніммен аттанады.

Біз қашанда өткенге салауат айтып, болашақтан жақсылық күткен халықпыз. 2017 жыл біз үшін берекелі де жемісті болды.

Қадірлі жерлестер!

Жаңа жыл Сіздердің жақсы тілектестеріңіз болып, үлкен жетістіктерге жетелесін. Барлық бастамаларыңызға жаңа табыс әкелсін. Атаулы мерекеге орай зор денсаулық, қуаныш пен бақыт тілейміз!

448 қарау пікір: 0

30/12/16 30 желтоқсан 2016 ж.

 

Құрметті жерлестер!

 

Барлықтарыңызды келе жатқан Жаңа Жылдарыңызбен құттықтаймын.

Еліміз тағы бір жылды артқа тастап, жаңа жылға аяқ басты. Мемлекеттік саясаттың арқасында еліміз дағдарысты еңсеріп, экономикалық дамудың жаңа жолына түсті.

Бұл жаңа мемлекет пен жаңа қоғамның дүниеге келуінің азапты толғаққа толы, сонымен бірге ғаламат сәті еді. Сол сәт әлі аяқталған жоқ, бірақ ең қиын белестерден аса білдік. Әрбір өткен жыл тарих беттеріне Қазақстанның даму жолындағы жасампаз жаңалықтарымен жазылып келеді.

Ауданымызда көптеген әлеуметтік, мәдени, спорттық нысандар, маңызды шаралар, бірқатар ұшқыр жобалар іске асты. Бұл-біздің бірлескен еңбегіміздің жемісі. «Ер тағдыры, ел тағдыры» демекші, 20

наурыз күні саяси науқан-сайлауды өткіздік.

Барақ батырдың 315 жылдығына орай, ескерткіш ашылып, ғылыми-практикалық конференция, айтыс, спорттық жарыстар облыстық, республикалық деңгейде өткізілді. Теректі ауылында «Марқакөл» мешіті, Үшбұлақ ауылында  ұзақ жылдар құрылысы тоқтап тұрған мектеп ашылды.

Шеңгелді ауылындағы негізгі орта мектепке қазақ халқының тұңғыш әскери ұшқышы Жақыпбек Малдыбаевтың аты берілді. Жеткен жетістіктеріміз бен толағай табыстарымыз тек береке-бірліктің арқасы екені белгілі. Өсіп-өркендеу жолына түскен Қазақстан қарыштап алға басты. Халқымыз өз тәуелсіздігін сақтауға, нығайтуға белінің бекем екендігін байқатты. Күні кеше ғана барша  қазақстандықтар ел Тәуелсіздігінің 25 жылдығын атап өтті.

Біздің ауданда да жыл көлемінде өткен барлық шаралар еліміздің торқалы тойына арналды.

Барлық әлеуметтік-экономикалық көрсеткіштер артып, жаңа жылға жақсы жетістіктермен, көтеріңкі көңіл күймен жетеміз деген ниеттеміз және жаңа 2017 жыл да жарқын келешекке бастайтынына нық сенімдімін.

«Шеберлік шыңына шыға білсең, мамандықтың бәрі жақсы. Қазіргі кезде техникалық мамандықтар, ғылым мен инно­вацияның күні туған заман. Еліне еңбек еткен, талмай ізденген, жалықпай техника меңгерген адам озады. Тұрмысы жақсы, абыройы асқақ болады», – деген Мемлекет басшысы. Бүгін арамыздағы өз мамандықтарының үздіктері де осыны дәлелдеп отыр.

Құрметті қонақтар!

Ақ ниетпен өткен жылды шығарып салып, ақ тілекпен жаңа жылды қарсы алуға жиналған әрқайсыңызға– береке, халқымызға – игілік, мемлекетімізге – молшылық, ал әр шаңыраққа – бақыт пен шаттық тілеймін.

83 қарау пікір: 0

16/12/16 16 желтоқсан 2016 ж.

Құрметті аудан тұрғындары!

Құрметті қонақтар!

 

Сіздерді 16 желтоқсан–Қазақстан Республикасының Тәуелсіздігінің 25 жылдығымен шын жүректен құттықтаймын.

Халқымызға ғасырлар бойы арман болған тәуелсіздік, егемендік ұстанымдарын биікке көтеретін бұл күн – біздің Отанымыздың әрбір азаматы үшін қастерлі мереке.

Біздерге ата-бабамыз ақ найзаның ұшымен, ақ білектің күшімен қорғап қалған, құлан жортса тұяғы тозатын, қыран ұшса қанаты талатын ұлан-ғайыр даласы бар, соншама алып кеңістікте мемлекет құру керек болды. Елдің алдында осы істің ұйытқысы болар, ел мүддесін, келешек қамын қамтамасыз ететін, үлкен саясаткер, елінің мәртебесін көтере алатын көсемін  таңдау сәті түсті.

Қазақстан халқы,  үміт пен күдік тең тайталасқан сол бір тағдырлы шақта, Тұңғыш Президентін сайлап, ата жолымен ант бергізіп, Отан тағдырын-уақыт сынынан өтіп шыңдалған  азамат деп  Нұрсұлтан Әбішұлы Назарбаевқа билік тізгінін ұстатты.

Республика Егемендігін ең алдымен көпұлтты Отанымыздың барлық халықтары мен ұлыстарының, одан кейін дүниежүзілік қауымдастықтың мойындауы Елбасымыздың көреген саясатының нәтижесі екенін ерекше атап өткім келеді. Мемлекеттік Тәуелсіздік туралы Декларацияны қабылдаған сәттен бастап, ата-бабамыздың ғасырлар бойы арманы болған, Егеменді Қазақстанның болашағын құруға құлшына кірістік.

Тәуелсіздіктің алғашқы жылдары халық қатты күйзеліске түсті. Сол кезде Елбасының өзі: «Біз-нарық жолын таңдадық, бұл сапарда қиыншылық көп болады, төзуге тура келеді. Ал, нәтижесінде біз тиімді экономикалық жүйе жасаймыз. Соның негізінде тұрмысты жақсартып, өркениетті елдердің қатарына қосыламыз. Мен сіздерді осы жолмен жүруге шақырамын»-деген болатын.

1991 жылы желтоқсан айында Кеңес Одағы деп аталатын, 70 жыл үстемдік орнатқан держава ыдырып, тарихи сахнадан кетті. 15 одақтас республиканың әрқайсысы әр жаққа  алаңдады. Бірі мұсылмандық, бірі Еуропаға көз тікті.

Кешегі күні тек орталықтың айтқанымен жүріп, соның дегені ғана болатын заманнан кетіп, тізгінді қолға алған қазақ елі үшін нағыз қиын кезең туып, тұралатқан шақ осы жылдар болатын. Кеңестер Одағы ыдырағаннан кейінгі кезде ақша құнсыздануының ерекше қарқын алуы және тұрғындарда ақшаның болмауын ескеріле келіп, Қазақстанда бүкіл тұрғындар тұрғын үйлерін жекешелендіруге қатысу үшін оларға төлем құралдары ретінде тұрғын үйлерді жекешелендіру купондар тегін ұсынылды. Бір купонның құны сол кездегі рубльге пара-пар болды. Берілген купондардың саны сол кездегі еңбек өтілімен айқындалды, ал біреудің асырауындағыларға екі мың купон таратылып берілді. Бағдарлама тұрғындардың ынтасын арттырып қана қоймай, жекешелендіру үрдісіне бұрынғы мемлекеттік мүлікті еліміздің белсенді тұрғындары арасында әділдікпен бөлуге болатынына халықтың үмітін оятты. Купондарға пәтер сатып алудың қарапайым тетігі қысқа мерзімде тұрғын үй нарығын қалыптастырып, халықтың белсенділігін және нарықтық қатынастарды дамытудың басқа да шарттарын қамтамасыз етті.

Халық басындағы әлеуметтік қиыншылықтар еселеніп, экономика құлдырады. Инфляция мың есеге дейін шарықтап, ақша құнының шегі білінбеді. Жұрт «жоқшылық заман келді ме» деп үрейленді. Расында да, тәуелсіздігінің ақиқатын жаңа сезіне бастаған Қазақстанның экономикасына аса ауыр болған кез 1993 жыл басталған еді. Бір қолға мөлшерленген заттарды талонмен ғана алатын болдық. Дүкендер сөресі бос қалды. Ауыл адамдары ала сөмке арқалап, қалаларды жағалап нәпақасын табуға кірісті.

Бұл туралы естелігінде Мемлекет басшысы Нұрсұлтан Назарбаев: «Егерде Ресейден келетін қолма-қол қаржыны бөлу 1992 жылы рубль аймағына кірген республикалар арасында азды-көпті тепе-тең жағдайда іске асырылса, ал 1993 жылы Ресейдегі экономикалық блокқа жауапты тұлғалар, Қазақстандағы әлеуметтік-саяси жағдайға тікелей немесе жанама түрде ықпал жасай отырып, өз міндеттерін басымдылық жағдайында шешіп, Қазақстанға бөлінетін қолма-қол ақшаны ұстап қалуды шығарды», – деп еске алады.

Нұрсұлтан Әбішұлы өзінің «Қазақстан жолы» атты естелік кітабында «1993 жылдың көктеміне қарай Қазақстан Ресейден мүлдем ақша алуды тоқтатты. Осы жылдың мамырында Ресей Үкіметі ТМД елдеріне техникалық несие беруді бүтіндей тоқтату туралы шешім қабылдаған болатын. Осының өзі елдің тәуелсіздігіне үлкен соққы болатыны айқын еді. 1993 жылы Негізгі заң қабылданғаннан кейінгі кезеңде атқарылған ауқымы кең шаралар, халықарлық жиындар мен нәтижелі басқосулар жетерлік. Оның ішінде ұлттың ұлылығын ұлықтап, тәуелсіздігін айшықтайтын нақты әрі басты оқиғаның бірі – төл Теңгеміздің тұғырға қонуы, Қазақстанда өзінің тұңғыш валютасының айналымға енуімен тәуелсіздікті онан сайын бекемдей түскен тәрізді еді. Мемлекеттер өз валюталарын енгізгенше рубль аймағын сақтай тұру туралы ТМД шеңберінде қол қойылған келісім-шарттың болуына қарамастан, ең басынан-ақ Ресей бұрынғы КСРО республикаларын рубль аймағынан итеріп шығаруға тырысты. Мен мұны сол кездерде барып тұрған әділетсіздік деп есептедім және әлі де солай деп есептеймін. Біз Ресейге сенетінбіз және біздің тату көршілік өзара қарым-қатынастарымызға да сеніммен қарайтынбыз. Қазақстан үшін бұл қадам төбеден жай түскендей болды, өйткені тұрғындардың 30%-ға жуығы орыстар еді және Қазақстан Ресеймен тығыз қарым-қатынаста болды. Одан арғы дамудың саясатын анықтай келгенде де мен біздің қарым-қатынастарымыздың нығаюы үшін барлығын жасауға тырыстым» – деп жазады.

Ұлттық валюта ретіндегі Теңге, біздің еліміздің тарихында өзінің рөлін тәуелсіздіктің экономикалық негізі ретінде ғана атқарған жоқ. Кейбір жағынан алғанда теңге – бұл тарихымыздың өзінің толымды бір бөлігі, өз заманының нысанына айналды.

Қазақстан ширек ғасырда күллі адамзат баласына өзінің дербес даму жолын көрсете білді. Даму жолы өзгеше бола тұра, Қазақстан өзінің тізгінін сеніп тапсырған көсемінің басшылығымен әлемнің ең дамыған мемлекеттерінің алдыңғы қатарлы тәжірибелерін бойына барынша сіңірді. Көптеген мемлекеттердің сан алуан конституциялық даму үлгілері мұқият зерттеліп, тек бұрынғы кеңестік аумақтағы ғана емес, тұтас әлемде болып жатқан саяси жағдайлар егжей-тегжейлі қарастырылды.

Сөйтіп, заманауи әлемдегі ең таңдаулы үлгілер мен үрдістер дереу Қазақстандық қоғамның ерекшеліктеріне қарай бейімделіп, солардың барлығынан ортақ бір үлгі жасалып, қолданысқа енгізілді. Міне, дамудың Қазақстандық үлгісі осылай пайда болды.

Соның нәтижесінде, Қазақстанда тәуелсіздіктің алғашқы күндерінен бастап, экономикалық және саяси жүйені реформалаудың стратегиясы жасалып, үздіксіз жүзеге асырылды.

Осыдан 25 жыл бұрын жас Қазақ елінің алдында жаңа мемлекет құрумен бірге, адамдардың жаңа өмірге бейімделуіне жағдай туғызу сияқты аса күрделі жауапкершілік тұрды. Қазақ елі  алғашқы болып Тәуелсіз мемлекеттер достығына бірігетіндігі туралы хаттамаға қол қойды.

25 жыл тарихи тұрғыдан алғанда қысқа мерзім, аз ғана уақыт. Алайда, осы қысқа кезеңде жанқиярлық еңбектің, туған елін өркениетті әрі заманауи мемлекетке айналдырғысы келген миллиондаған қазақстандықтардың ақ ниетінен туған ерлік пен жігердің жемістері мен толағай жеңістері болды. Соның арқасында Қазақстан Тәуелсіз ел ретінде бесігін түзеді.

«Қазақстан Республикасының Мемлекеттік тәуелсіздігі туралы»  18 баптан тұратын Заңда мемлекеттің де халқымыздың да тілегі мен мақсат-мүддесіне сай келетін-елдің егемендігі мен тәуелсіздігі; шекарасының бүтіндігі; басқа елдермен қарым-қатынасты халықаралық қатынастар нормасына сай жүргізетіндігі толық қамтылды. Сонымен бірге ел азаматтарының ұлтына, дініне, тегіне, әлеуметтік жағдайына қарамастан бірдей құқықты иеленетіні; өкілетті, атқарушы және заң шығарушы басқа да мемлекеттік органдары бар; тәуелсіз экономиканың негіздері мен мемлекеттің тәуелсіздігін қорғау түгелімен ескерілді.

Еліміз Тәуелсіздік жолын дәлелдеу мақсатында Семей полигонын жапты. Республиканың жоғарғы органы Парламент жүйесін жолға қойып, Қазақстан Республикасының мемлекеттік нышандарын белгілеп, тіл саясатын саралап бекітті.

Қазақстан конфессияаралық және этносаралық татулық пен келісім үстемдік құрған мемлекет дамуының бүкіл әлемде танылған жаңа бірегей моделін құрды. Мемлекет басшысы Қазақстан халқы бірлігін нығайтудың конституциялық мәртебесі бар айрықша институты-Қазақстан халқы Ассамблеясын құрды. Нарықтық экономиканың  қазақстандық моделін жасап, шекараны бекітті. Төл теңгемізді танытып, білім мен ғылымды дамытты.

  Халқымыз елдің біртұтастығы мен тыныштығын сақтауға бар өмірін сарп еткен  батырларын, тарихқа өлшеусіз үлес қосқан ірі тұлғалар ретінде ардақтап, олардың өлмес рухын ұлт мақтанышы ретінде күні бүгінге дейін жеткізді. Бұл қасиетті шежіре – бүгінгі буын арқылы, келер ұрпақтың бойына жастайынан сіңірілетін баға жетпес игілік деп танылады. Осы өнегені, елжандылық, отансүйгіштік дәстүрді жастардың бойына дарыту, патриоттық рухта тәрбиелеу – бүгінгі таңда әрбір қазақстандықтың қасиетті борышына айналуға тиіс деп білемін.

Елбасымыз өткен дәуірдегі қаһармандық оқиғалардың тізбегіне  баға бере келе  «Ұлы далада бірінен соң бірі толас таппай жүріп жатқан 200-ге тарта көтерілістер эстафетасы, біздің бүгінгі тәуелсіздігіміздің бастау көздері» деп бағалаған болатын.  Соның ең соңғысы–тоталитарлық жүйенің темір құрсауын талқандауға арналған қазақ жастарының 1986 жылдың 16 желтоқсанында «Желтоқсан оқиғасына» қатысуы болып табылады.

Міне, осындай ұмытылмас оқиғадан бері 30  жыл өтті. Сол үш күнде, дүниені дүр сілкіндірген қазақ қыздары мен ұлдарының рухына, ерлігіне деген тағзым, құрмет!

Желтоқсанның желіне тоңған күршімдіктер бүгінгі салтанатты жиынның құрметті қонақтары.  Олар: Оралбаев Жандарбек Қалибекұлы, Дүсіпов Бақытбек Төлеуханұлы, Сырымбаев Ерназ Закенұлы, Жұмекенова Ляйля Кәкенқызы, Шошенова Бақытгүл Тұлғанбекқызы, Қоштаева Күлайым Аймқанқызы, Майқынова Айгүл Мұхаметрахымқызы, Кенжеханова Роза Мәнәпқызы, Әбіштайұлы Ержан және Шапатова Қарлыға Сейтқұмарқызы.  Қазіргі уақытта бұл азаматтар тәуелсіз еліміздің өсіп өркендеуіне  үлес қосып, ауданымызда  абыройлы еңбек етуде.

Елбасы саясатының арқасында елімізде биліктің барлық тармақтары заңды түрде қалыптасып, нәтижелі жұмыс жасауда. Аудан дамуының экономикалық табыстары ауданда тұратын әр отбасының, әр адамның әл-ауқаты мен өмірінің жақсаруына әсер етті.

Тәуелсіздік жылдары осындай көптеген бағдарламаларды іске асыру, республикамызды ұшан теңіз жетістіктерге жеткізсе, ауданда да көптеген өзгерістер болды.

Президентіміз Нұрсұлтан Назарбаев 2015 жылғы Жолдауында: «Болашақ – аграрлық секторда, әсіресе, шағын және орта бизнес түріндегі жаңа өңдеу кәсіпорындары желісін құруда. Бұл тұста біз бизнесті несие арқылы қолдауға тиіспіз. Фермерлер ұзақ мерзімді қаржыландыру мен өткізу нарықтарына делдалсыз, тікелей шыға алатын болуға тиіс. Ауылшаруашылығының тауарөндірушілерінің қарыздарын кепілдендіру және сақтандырудың тиімді жүйесін құру да өзекті мәселе» – деп атап айтты.

Елбасының сарабдал саясатын жүзеге асырудың нәтижесінде тәуілсіздік жылдары мемлекетіміздің экономикасының барлық саласы қарқынды дамыды.

Елімізде ауыл шаруашылығын дамытуға бағытталған бірқатар маңызды бағдарламалар бар. Соның бірі «Агробизнес-2020» мемлекеттік бағдарламасының игілігін шаруа қожалықтары сезіне бастады. Аграрлық несие корпорациясы АҚ-ның ірі қара мал басын арттыруға арналған «Сыбаға», жылқы шаруашылығын дамытуға бағытталған «Құлан» бағдарламалары арқылы ауданымызда  еттi мал шаруашылығын дамытуға ерекше көңіл бөлініп отырғаны аян. Біздің ауданымызда кәсіпкерлік пен ауыл шаруашылығының әрбір саласы бойынша мемлекеттік бағдарламалар жасалып, жеке кәсіппен айналысуға ниет білдірушілерге жеңілдікпен несие беру, мал басын өсіруге, лизингке техникалар беру сияқты жан-жақты көмек көрсетіліп отыр. Мемлекет тарапынан қабылданған «АгроБизнес-2020», «Бизнестің жол қартасы-2020», «Жұмыспен қамту жол картасы-2020» бағдарламалары арқылы ауданның көптеген шаруа қожалықтары, кәсіпкерлер және жұмыссыз отырған азаматтар қолдауға ие болып, өз кәсіптерін одан әрі дамытуда.

–  1991 жылмен салыстарғанда өнеркәсіп өнімі 124 есеге, негізгі капиталға инвесторлармен тартылған инвестиция көлемі-613 есеге, құрылыс жұмыстарының көлемі-501 есеге, бөлшек сауда айналымы-119,2 есеге, орташа айлық еңбекақы-255 есеге артты.

Екі аудан бірігіп Күршім ауданы қайта құрылған 1997 жылмен салыстырғанда  Мал басы саны ірі қара  2,4 есеге, қой мен ешкі 3,5 есеге, жылқы 2,9 есеге өсті.

«Қазақстан-2050» стратегиясында Елбасы шағын және орта бизнесті қолдау мен ынталандырудың кешенді шараларын атқара отырып, кәсіпкерлікті ұлттық экономиканың жетекші күшіне айналдыру тапсырылған. Кәсіпкерлік біздің экономикамыздың өркендеуіндегі басым бағыттардың бірі болып табылады.

Шағын және орта бизнесті мемлекеттік қолдау бойынша қабылданған шаралар және кәсіпкерлер құқығын қорғау қоғамда орта топтың қалыптасуын қамтамасыз етуде. Тәуелсіздік жылдары кәсіпкерлікті дамытуға айрықша назар аударылды. Ауданымызда кәсіпкерлік нысандар 3 есеге артып, 458-ді құрады. Осы атаулы сектор бюджетке салықтың тұрақты түсуін және халықтың жұмыспен қамтылуын қамтамасыз етеді. Аталмыш жұмыстардың арқасында 1997 жылмен салыстырғанда бөлшек сауда айналымы 264,4 млн. теңгеден 4797,0 млн.теңгеге, орташа айлық жалақы есеге 5 мың 767 теңгеден 84 мың 126 теңгеге өсті.

Білім беру саласы «Қазақстан-2050»  ұзақ мерзімді Стратегиясының маңызды басымдықтарының бірі болып танылады. Қазақстандағы білім беру реформаларының жалпы мақсаты-білім беру жүйесін жаңа әлеуметтік-экономикалық ортаға бейімдеу болып табылады. Тәуелсіздік жылдары білім беру саласында көптеген жақсы жаңалықтар болды. Тақыр, Маралды, Төсқайың Алғабас, Топтерек, Мөнекей, Теректібұлақ, Барақ батыр, №3 Күршім гимназиясы, Қарашілік, Ақсуат, Қойтас, Шеңгелді, Жаңауыл, Ақжайлау және күні кеше ғана ашылған Үшбұлақ ауылдарында барлығы 16  жаңа мектеп ғимараттары жаңадан салынып, қолданысқа берілді.

112 модификациялы жаңа кабинеттер алынды. 177 түлек мектепті «Алтын медаль» мен «Алтын белгіге» аяқтады.

– 29 оқушы-республикалық пәндік олимпиаданың,  26 оқушы-республикалық, халықаралық ғылыми жобалар сайысының жүлдегерлері;

Қай қоғамның да қай мемлекеттің де басты байлығы-адам. Соңдықтан да адамдардың денсаулығы қашанда алдыңғы кезекте қойылады. Ауданда Қаратоғай, Бурабай, Сарыөлең ауылдарында дәрігерлік амбулаториялар салынды.

Денсаулық сақтау саласы бойынша көрсеткіштері қанағаттанарлық деңгейде.  Бала өлімінің көрсеткіші тәуелсіздік жылдарында 18,6 пайыз болса, бүгінгі күнге  5,7 пайызды көрсетуде.

Елімізде халыққа сапалы медициналық көмек көрсету, қолжетімді дәрі-дәрмекпен қамтамасыз ету, материалдық-техникалық базасын жақсарту, озық технологияларды қолдану әркез мемлекеттік саясаттың басым бағыттарының бірі болып қала береді.

Салауатты өмір салтын қалыптастыру – ұлт денсаулығының кілті болып саналады.

Еліміздің өнері мен мәдениеті қарыштап дамыды. Атап айтқанда 25 жыл ішінде 350 орындық аудандық Мәдениет үйі салынып, үш ауылдық мәдениет үйлері, ауылдық клубтар күрделі жөндеуден өтті. Бүгінгі күні ауданда спортпен халықтың жүйелі түрде шұғылдануы үшін, қолжетімді 195 спорт объектісі бар. Оның ішінде: 34 спортзал, 11 хоккей қорапшасы, 2 стадион, 4 жасанды жабындысымен кіші футбол алаңдары және 143 жазық жердегі спорттық құрылғылар бар. Аудандағы білім мекемелеріндегі 28 спортзал сабақтан тыс мезгілде және сенбі, жексенбі күндері тұрғындардың спортпен жүйелі түрде айналысуы үшін тегін беріледі.

15 спортшысы тәуелсіздік жылдары ауданның намысын қорғап, әлемдік спорт жарыстарының, 17 спортшы Азия ойындарының, 180 спортшы Қазақстан Республикасы чемпионаттарының жүлдегерлері атанып, 6 спортшы халықаралық санаттағы спорт мастері, 65 спортшы-спорт мастері және 88 спортшы-спорт мастерлігіне кандидат дәрежесін қорғады.

Жүргізілген жұмыстардың нәтижесінде ауданда спортпен жүйелі түрде айналысатын халық саны 8263 адамды, яғни аудан халқының 30 пайызын құрады.

Инженерлік инфоқұрылым бойынша тәуелсіздік жылдары бірқатар жұмыстар атқарылды. Қазіргі жағдайда инфоқұрылымның тиімді қызмет атқаруы және тұрақты дамуы өңір экономикасының өрлеуіне, тұрғындардың өмір сүру деңгейі мен жағдайын жақсартуда маңызды факторлардың бірі.

– 33 елді мекенде жер асты суы бұрғыланып тұрғындар таза ауыз сумен қамтылды;

– 2474  көше шамдарымен 45 елді мекендер жарықтандырылды;

– 54,7 шақырым жол асфальттанды.тұрғындарды баспанамен қамтамасыз етуде елеулі жетістіктерге жетті. 1991-2016 жылдар аралығында тұрғын үй құрылыс жұмыстары жүргізіліп, 66275  шаршы метр пайдалануға берілді.

Көлік мемлекет ішіндегі және халықаралық еңбек бөлінісінің материалдық негізі болып табылады және осы жылдары жеке меншікке 7812 автокөліктер сатылып алынды.

Тәуелсіздік жылдарында «Қазақтелеком» акционерлік қоғамының Күршім аудандық филиалында да көптеген жағымды жаңалықтар болды. Телефон нүктелері 5002-ге көбейді. Кабельді, мегалайн, ID TV (айди тв) сияқты жаңа қызмет түрлері көрсетіле бастады.

Елбасымыз атап өткеніндей: «Қазақстанның тәуелсіздігі-біздің ең қастерлі, әрі құнды байлығымыз». Тәуелсіздігіміз жарияланғаннан бері көптеген елеулі табыстарға қол жеткіздік. Бұл Президентіміздің жүргізіп отырған көреген саясатының нәтижесі-Еліміздің тыныштығы мен қауіпсіздігінің, көпұлтты Қазақстан халқының жарастығы мен ынтымақтастығының арқасында болып отыр. Еліміздің тәуелсіздігі мен мемлекеттілігінің орныға түсуі, ұлттық қауіпсіздігі, экономикамыздың жедел қарқынмен дами беруі, қазақстандықтардың өз болашағына деген берік сенімі қазіргі замандағы өркениетті қауымдастық ортасында іргелі елге айналуы-стратегиялық негізгі бағыттарды құрайды.

Жыл сайынғы Президенттің халыққа арналған Жолдаулары мен қабылданған мемлекеттік бағдарламалар, стратегиялық бағыттардың барлығы да қарапайым халықтың тұрмысын жақсартып, тәуелсіздігімізді нығайтуға бағытталды.

Сондықтан бұл күн жас мемлекетіміз үшін – біртұтас елдіктің, ынтымақтастық пен татулықтың, сонымен қатар өткенге деген тағзымды салауат пен болашаққа деген сенімді үміттің мерекесі болып табылады. Еліміздің ұлы тарихына, ата-баба рухына, аға ұрпақтардың қаһармандық өмір жолына құрметпен басымызды иіп,

Отанымыз-Қазақстанға деген құрметтеу сезімін әкелетін бүгінгідей мереке күні алға қарай тағы да берік сеніммен қарап, болашақтың тыныш өмірінің негізін қалау үшін қазір де бұл бағыттағы іс-әрекетті жалғастыру керек.

Болашақты алыстан болжайтын саясаткер Нұрсұлтан Әбішұлы мемлекетіміздің 2050 жылға дейін әлемдегі дамыған 30 мемлекет қатарына енуін ұлттық саяси даму стратегиясына негіз ете отырып, осы уақыт ішінде бағындырылуға тиісті белестерді бағындырып, жылдағы кезекті Жолдауында атқарылатын жұмыстарды нақтылап қойып беріп отырады.

Елбасы Н.Ә.Назарбаев өз сөзінде «Мен барша халқымды жарқын болашаққа жол бастайтын адамзат баласының мәңгілік құндылықтары – ерік-жігер мен еңбексүйгіштік, мақсаткерлік қасиеттерді бойға сіңіруге шақырамын. Мен 21-ғасыр Қазақстанның «алтын ғасыры» боларына сенемін. Бүгінгі әлемдегі жағдай «біздің жетістіктеріміз сыналатын, елдігіміз шыңдалатын сәт және осы жауапты сәтте «Біріміз-бәріміз үшін, бәріміз-біріміз үшін» қағидасын ұстанып, аянбай еңбек етуге шақырамын”-деген еді. Мен де барлығымыз осы бағытта жұмыс жасаймыз деген сенімдемін.

 

Құрметті аудан тұрғындары!

Ата-бабаларымыздың алдында тәуелсіздік үшін күресу мақсаты тұрған болса, біздің алдымызда оны нығайта түсу міндеті тұр. Бұл – тәуелсіздікті нығайту жолындағы өлшеусіз еңбегіміздің ширек ғасырлық белесін қорытындылайтын мерейлі сәт. Барлығымыздың мойнымызда еліміздің болашағы үшін орасан зор жауапкершілік жатыр. Біз жаңа жаһандық дағдарысты міндетті түрде жеңеміз. Бұл үшін бізде біртұтас ерік-жігер, халық бірлігінің берік дәстүрлері бар. Біз елімізді дамудың жаңа шептеріне шығаратын боламыз! Ел тәуелсіздігі, ұлт мұраты, ұрпақ болашағы сияқты ұлы құндылықтар ғана мәңгі. Рухы биік, еңбегі ерен, бірлігі мығым Мәңгілік Ел болу үшін бізде бәрі бар. Тәуелсіздіктің туын желбіретіп, тұғырын нығайтқан біздің тарих алдында жүзіміз жарқын! Біздің тірегіміз – тәуелсіздік, тілегіміз – тұрақтылық, білегіміз – бірлік!

Көк байрағымыздағы алтын қырандай еліміз қанатын кеңге жайып, асқар биіктерден көрінсін! Барды бағалап, жоқты жасай білген жасампаз жұртымыздың көк байрағы әрдайым биікте желбіресін!

35 қарау пікір: 0

16 желтоқсан 2016 ж.

Құрметті  аудан тұрғындары!

 

Ұлттық қасиетіміз бен құндылықтарымызды ұлықтап, азаттық сүйгіш, рухы биік, намысы берік халық ретінде әлемге танытқан Тәуелсіздігіміздің 25 жылдық мерейтойымен құттықтауға рұқсат етіңіздер!

Бұл әрқайсымыз үшін теңдесі жоқ қасиетті мереке! Себебі тәуелсіздік – бабаларымыздың ғасырлар бойғы аңсаған арманы еді. Оның арайлап атқан таңын көру бақыты бүгінгі ұрпақ – біздерге бұйырды.

Бүкіл әлем Қазақстанымызды бейбітшілік сүйгіш, ынтымағы жарасқан көпұлтты ел ретінде жақсы таниды. Бүгінгі күні көптеген халықаралық маңызы бар бастамаларды жүзеге асырып, ауызбіршіліктің, береке-бірліктің арқасында қол жеткіздік.

Ендеше, әрқашан да әрқайсымыздың «кішкене отбасымыздан басталатын кең-байтақ ұлы Отанымыздың» Тәуелсіздік күні құтты болсын!

Көк аспанымызбен астасқан көк туымыз әрдайым биіктен желбірей берсін!

29 қарау пікір: 0

01/12/16 1 желтоқсан 2016 ж.

Құрметті аудан тұрғындары!

 

Барлықтарыңызды ел тарихындағы елеулі мереке – Қазақстан Республикасының Тұңғыш Президенті күнімен шын жүректен құттықтаймыз!

Тұңғыш Президент – Елбасы Н.Ә.Назарбаевтың сарабдал саясатының арқасында Тәуелсіз Қазақстанды халықаралық аренада мойындады.

Мемлекет басшысының жүргізіп отырған ішкі және сыртқы саясаты әлеуметтік-бағдарлы экономикасы бар заманауи, қарқынды дамушы мемлекет құруды қамтамасыз етті.

Құрметті жерлестер!

Мереке қарсаңында баршаңызға мықты денсаулық, отбасыларыңызға бақ-береке, туған жерімізге бейбітшілік пен гүлдену тілейміз

33 қарау пікір: 0

Құрметті аудан тұрғындары!

Құрметті қонақтар!

Баршаңызды мемлекеттік мереке-Қазақстан Республикасының Тұңғыш Президенті күнімен құттықтаймын!

Биыл төртінші жыл қатарынан барша қазақстандықтар шын мәніндегі халықтық мереке-Президент күнін атап өтуде. Бұл күн–еліміздің тәуелсіздігіне қол жеткізу тарихында және жаңа мемлекеттік даму стратегиясын айқындауда орасан зор маңызға ие.

Әлемнің көптеген мемлекеттерінде Президент күні ресми түрде аталып өтеді. Біздің елімізде де дәл осы күннің «Президент күні» ретінде таңдалып алуының өзіндік себебі бар.

1991 жылғы 1 желтоқсанда алғаш рет Қазақстан Республикасы Президентінің жалпыхалықтық сайлауы өтіп, дауыс беру құқығы бар сайлауға қатысқан барша азаматтардың 98.78 пайызы Нұрсұлтан Әбішұлы Назарбаевты қолдап дауыс беру арқылы өздерінің тарихи таңдауын жасаған еді. Сол күні егемен еліміздің негізін қалаушы, Нұрсұлтан Назарбаев қазақ мемлекетінің тұңғыш Президенті атанғаны белгілі.

Бұл жеңіс қазақ мемлекеттігін қалыптастырудағы қиын кезеңде халық сынынан сүрінбей өткен перзентіне ел тағдырын сеніп тапсырған Қазақстан халқының аса жауапты таңдауы ғана емес, сол перзентінің иығына артқан мың батпан сенімі мен жауапкершілігі болатын. Бұл таңдау бір жағынан жаңа саяси жүйенің ең басты лауазымы-Қазақстан Республикасының Президенті қызметінің зор беделінің де көрінісі іспетті болды.

Ел үшін тұтас бір қоғамдық, саяси, экономикалық жүйені тазалап, тыңнан, мүлдем жаңа тұрпатты жүйе құру барысында асқан жауапкершілікті кезең басталар тұста, ел ішіндегі аса күрделі жағдайға қарамастан мемлекеттің іс жүзіндегі егемендігін қамтамасыз ететін мемлекеттік актілерді қабылдау тек Нұрсұлтан Әбішұлы сынды көреген де кемеңгер, тәжірибелі, беделді, белсенді, батыл саясаткердің қолынан келетін шаруа екендігін бүкіл халық көрді.

Қалай болғанда да сонау 1991 жылдан бастап  1 желтоқсан заманауи тарих шежіресінің алтын жолдары ретінде жылнамаға жазылды.

Сол жылы 29-тамызда Президент жер бетіндегі ең ірі ядролық сынақ алаңы – Семей полигонын біржола жабу туралы Жарлыққа қол қойып, барша адамзат үшін тарихи маңызы бар шешім қабылдады.

Сайлау өтісімен көп ұзамай жалпақ әлемге жария етілген Қазақстанның мемлекеттік тәуелсіздігі ұлы бабаларымыздың ғасырлар бойы аңсаған армандарын орындап, олардың азаттық жолында төгілген есепсіз қаны мен қисапсыз жасының өтеуін біржола қайтарды.

Сол 90-ыншы жылдардағы дәуірлер алмасқан кезеңді еске алған Қазақстан Президенті «Жер шарының басқа аймақтарында болып жатқан осы тақылеттес үрдістерден Кеңес Одағының ыдырауының негізгі айырмашылығы: ол бұрын ешқандай негізі болмаған мүлдем жаңа мемлекеттердің пайда болуына емес, тағдырдың тәлкегімен бір замандарда тізгіні қолдарынан сусып шығып кеткен, терең тарихи тамыры бар мемлекеттердің қайта жаңғыруына бастады. Біз ол кезде Кеңес Одағының ыдырауы жөнінен ғана емес, бұрынғы еркін елдердің мемлекеттіліктерінің қалпына келуі арқылы тарихи, заңдық әділеттіліктердің салтанат құруы тұрғысынан да аса күрделі процесс өткенін айта аламыз» деген болатын.

Сондай күрделі кезеңде Қазақстанға президенттік билік институтының енгізілуі өмірлік қажеттіліктен пайда болған, айналып өтуге тіптен болмайтын жаңа заманның талаптарынан туындаған қадам еді.

Президент лауазымы алда күтіп тұрған реформалар жағдайындағы елдің саяси жүйесін барынша тұрақты, әрі басқаруға ыңғайлы ете түсті.

 

Құрметті жерлестер!

Президентіміз әлемдік дағдарыс жағдайында бізде индустрияланудан басқа балама ештеңе жоқ, біз жер қойнауына, мұнай мен газға, металға сенім артып қана отыра алмаймыз дейді. Жаңа индустриялық жобалардың алғашқыларының бірі – Астанадағы локомотив құрастыру заводын ашу кезінде Қазақстан Президенті: «Біз бұған дейін жалпы Қазақстанда болмаған индустрияны жасауымыз керек» деген еді.

Ел экономикасының нақты секторларын дамыту бағытында сенімді өзгерістер күтілді. Әлемдік дағдарыстың салдары қазақстандықтарды қорқыта қойған жоқ. Өйткені олар дағдарыстың екінші толқыны бола қалған жағдайда, мемлекеттің оған қарсы қолданатын тиімді бағдарламасы ғана емес, сонымен бірге, алдағы бес жылдық үшін нақты даму жоспары бар екенін жақсы біледі.

2010-2016 жылдары индустриалды – инновациялық даму бағдарламасы аясында жүздеген жобалар іске асырылды. Қарқынды индустриялану үстіндегі мемлекет өз азаматтарының алдындағы барлық әлеуметтік міндеттемелерін толығымен орындап, әлемнің ең дамыған елдерінің өзі күрт үнемшілдікке барып, жалақы, зейнетақы және әлеуметтік төлемдерін қысқартып жатқанда, Қазақстанда керісінше зейнетақы мен жалақы еселеп өсе түсті.

Қазақстан Республикасының бесжылдық жоспары әртараптандырылған экономикасы бар дамыған елде бақуатты азаматтардың санын арттыруға бағытталған. Шетелдік инвесторлар Кеңесінің отырысында Мемлекет басшысы: «бұл – дағдарыстан кейінгі даму жолында біздің азаматтарымыздың әл-ауқатын тұрақты және ұзақ мерзімді қамтамасыз ету үшін жалғыз дұрыс жол» деп атап көрсетті.

Нұрсұлтан Әбішұлы өз қолымен құрған саяси жүйе бір жағынан өзінің тұрақтылығымен, екінші жағынан басты демократиялық құндылықтарға, саяси-құқықтық тетіктерге деген ілтипатымен, құрметімен ерекше. Бұл өз кезегінде біздің елімізге деген әлем қауымдастығының құрметі мен сенімін арттырып, әлемдегі ең ықпалды саясаткерлердің бірі екенін дәлелдей түсті. Нұрсұлтан Назарбаев әлемдік тарихтың барысына өзіндік із қалдырған, із болғанда да жарқын із қалдырған тарихи қайраткер ретінде әлемді мойындатып отыр. Н.Назарбаевтың экономист және саясаткер ретіндегі жеке беделі елде қолайлы инвестициялық ахуалдың қалыптасуына, көптеген мемлекеттермен және халықаралық қаржы институттарымен қарқынды экономикалық ынтымақтасуға игі ықпал етті.

Елбасының бастамасы бойынша әр азаматтың өмір сүру деңгейін арттыруға бағытталған «Бизнестің жол картасы-2020», «Агробизнес-2020», «Жұмыспен қамту-2020» бағдарламалары елімізде жүзеге асырылып жатыр.

Дүниежүзілік сарапшылар арасында «қазақстандық үлгі» термині пайда болды. Оның көптеген бастамалары кең халықаралық жаңғырық тапты. Мәселен, Семей ядролық полигонын жауып, ядролық держава мәртебесінен бас тартуы. Вашингтонда болып өткен Ядролық қауіпсіздік жөніндегі саммит Қазақстан үшін ғана емес, сондай-ақ, бүкіл­әлемдік қоғамдастық үшін де кезеңдік саммит болды, Саммит шеңберінде Елбасының «Әлем. ХХІ ғасыр» манифесі жария етілді.

Жаһандық және өңірлік қауіпсіздікті қамтамасыз ету жөніндегі Кеден одағы, Шанхай Ынтымақтастық Ұйымы, Еуразия одағы сияқты халықаралық құрылымдарды дүниеге әкелудің бастамашысы. Ол БҰҰ Бас Ассамблеясының 47-сессиясында құруды ұсынған Азиядағы өзара ықпалдастық пен сенім шаралары жөніндегі кеңес іс жүзінде жұмыс істей бастады.

 

Тәуелсіздікке қол жеткізу қандай қиын болса, оны сақтап, іргесін нығайту жолында да қиындықтар аз кездеспегені тарихтан мәлім.

Осындай қиындықтан, дағдарыстан алып шығып, егеменді еліміздің іргесін нығайту үшін Елбасымыз Нұрсұлтан Әбішұлы Назарбаевтың саясаты өркениет көшін алға жылжытуда.
Сондықтан да, Нұрсұлтан Назарбаев — мемлекеттігімізді орнатып, оны қалыптастырып, экономикасын реформалау арқылы өзін де, елін де әлемге мойындатқан заманның аса дарынды тұлғасы деп айта аламыз. Аумалы-төкпелі алмағайып заманда мың өліп, мың тірілген қазақ үш ғасыр бойы іздеген мұратына да, арманына да жетті. Билік тізгінін қолына ұстаған жылдардағы Президентіміздің жарқылдаған келбетін, биік болмысын, кемел дарынын, ел басшысы ретінде көсемдік қасиеттерін бүгінгі ұрпақ жақсы білуі тиіс деп ойлаймыз.

Президентіміз ұсынған «Қазақстан-2030», «Қазақстан-2050» Стратегиялары, «100 нақты қадам» Ұлт Жоспары сынды ауқымды бағдарламаларды дәйекті түрде жүзеге асыра отырып, әлемнің озық 30 елдің қатарына қосылуға қарышты қадам басудамыз.

Елбасы ел ішінде барлық салаларда реформаларды жасай отырып, халықтың билікке деген сенімін арттырды.

Біздің еліміз әлемдік қоғамдастықта орнын нық айқындап, лайықты құрмет пен беделге ие болып отыр.

Әлемде аумағы жөнінен тоғызыншы орын алатын Қазақстан Республикасының шекарасын делимитациялау мен демаркациялау Президент Нұрсұлтан Назарбаевтың тарихи жетістіктері болып табылады.

 

Құрметті аудан тұғындары!

Қадірлі қонақтар!

Қазақ жұрты елдікпен бірге Елбасылы болды, Елбасы арқылы елдігін дамытты. Сондықтан Елбасы ұғымын ту, елтаңба, әнұран сияқты мемлекеттің елдігі мен бірлігін, тәуелсіздігі мен тұтастығын айқындайтын негізгі рәміздердің бірі деп ойлаймын. Бұл орайда Ел мен Елбасы – етене егіз ұғымдар. Осыған байланысты Елбасыға деген құрметті елдікке құрмет деп қараған жөн сияқты. Ендеше Елбасы күнін атап өтуді елдікті еңселетіп, тәуелсіздікті тұғырлы ете түсетін ерекше күннің бірі деп санаймын. Елбасының ерен еңбегінің шын бағасын халық осындай арнайы мерекелер арқылы түсінетін болады.

Осы мереке күні, Сіздерге еңбектеріңізге жеміс, отбасыларыңызға мықты денсаулық, береке-бірлік, көтеріңкі көңіл күй тілеймін!

Елбасымыз аман, халқымыз берекелі, еліміз тыныш болсын!

27 қарау пікір: 0

20/11/16 20 қараша 2016 ж.

Құрметті ауылшаруашылығы қызметкерлері!

 

Сіздерді кәсіби мерекелеріңізбен шын жүректен құттықтаймыз!

Елбасы Н.Назарбаев өзінің Жолдауында: «Шаруалардың жеке мүдделерін пайдалана отырып, нарықтық экономика қағидаларына негізделген ауылшаруашылығы экономикасының дамуы-халық шаруашылығын көтерудің стратегиялық резерві»-деп атап көрсеткен болатын.

Негізгі кәсібі ауылшаруашылығы болып табылатын ауданымыздың азаматтары Елбасы Жолдауында көрсетілген міндеттерді абыроймен орындауда. Мал тұқымын асылдандыруға, егістік алқабын ұлғайтуға байланысты жобалардың пәрменді түрде іске асуы аудан тұрғындарының әлеуметтік ахуалының, тұрмыс деңгейінің өсуіне алып келері сөзсіз.

Қадірменді ауыл шаруашылығының қызметкерлері!

Сіздерді төл мерекелеріңіздің қарсаңында дендеріңізге саулық, отбасыларыңызға амандық, қызметтеріңізге сәттілік тілейміз! Халық ырысын молайтуға бағытталған жұмыстарыңыз жемісін беріп, биік табыстарға жете беріңіздер!

28 қарау пікір: 0

15/11/16 15 қараша 2016 ж.

Қадірменді қаржыгерлер!

 

Сіздерді бүгінгі Ұлттық Валюта күнімен шын жүректен құттықтаймыз!

Осы күнді таңдау кездейсоқ емес және бұл күн өзіміздің ұлттық валютамыз – теңгенің 1993 жылдың 15 қарашасында айналымға енуімен байланысты.

Адамзат кез-келген жұмыстың, әр мамандықтың абыройлы екендігін және де адамның өз жұмысына қаншалықты жауапкершілікпен қарап, қаншалықты ынта-жігермен жұмыс істейтініне байланысты болатынын әрқашан мойындап отырған. Барлық кәсіп өздігінше ерекше және маңызды. Әр кәсіптің өзінің жұмыс айрықшылығы, өзінің қайталанбас тарихы, өз құндылығы бар.

33 қарау пікір: 0

15 қараша 2016 ж.

Құрметті қаржы жүйесінің қызметкерлері!

 

Сіздерді Ұлттық валюта – теңге күні және кәсіби мереке -Қаржыгерлер күнімен құттықтаймын!

Бүгінде мемлекеттік қаржы саясаты отандық экономиканы дамытудың  теңдессіз құралына айналды. Ол бізге түйткілді деген әлеуметтік және саяси мәселелерді оңтайлы шешіп, мемлекетіміздің халықаралық аренадағы беделін арттыра түсуге мүмкіндік беруде.
Сондықтан да, қаржы жүйесі қызметкерлерінің басты міндеті еліміз қол жеткізген табыстарды молайту, күрделі деген мәселелерді шешіп, экономикалық өсімді және әлеуметтік тұрақтылықты қамтамасыз етуде осы ресурстар мен мүмкіндіктерді тиімді пайдалану болып табылады.
Сіздердің жоғары кәсіби біліктіліктеріңіз бен жауапкершіліктеріңіздің арқасында қаржы қызметінің беделі арта түсетіндігіне сенімдімін. Осы мүмкіндікті пайдалана отырып, сіздерге шын жүректен бақыт, жемісті еңбек, кәсіби табыс тілеймін. Қаржы саласында жаңа белестерді бағындыра берулеріңізге тілектеспін. Еліміздің игілігі жолында қолға алған әрбір істеріңіз бен жоспарларыңыз ойдағыдай орындала берсін!

 

24 қарау пікір: 0

13/07/16 13 шілде 2016 ж.

Құрметті Ұлттық қауіпсіздік комитетінің қызметкерлері!

 

Сіздерді Қазақстан Республикасының Ұлттық қауіпсіздік комитеті күнімен шын жүректен құттықтаймыз!

Қазақстан Республикасының Президенті Нұрсұлтан Әбішұлы Назарбаев өзінің Жолдауында ішкі саяси сала мен ұлттық қауіпсіздіктің 2050 жылғы дейінгі негізгі мақсаттары қоғамда келісім мен тұрақтылықты сақтау, ел қауіпсіздігін нығайту болып қала беретіндігін атап көрсетті.

Тәуелсіз мемлекетіміздің ішкі және сыртқы саяси тұрақтылығын сақтауда, халқымыздың тыныс-тіршілігін қорғаған маңызды да жауапты қызметтеріңізге табыс тілеп, қашанда мәртебелеріңіздің биік болуына, жақсылыққа толы күндеріңіздің мол болуына тілектеспіз.

Сіздерге мықты денсаулық, мерекелік көңіл-күй, отбасыларыңызға береке-бірлік, қуаныш тілейміз!

24 қарау пікір: 0
Page 1 of 41234